Relatório das Jornadas da língua e IV Descida em Defesa da Língua, "O Futuro da nossa Língua", Tui

O 18 e 19 de Agosto celebrárom-se em Tui as Jornadas da Língua organizadas polo Movimento Defesa da Língua. Estas jornadas programárom-se na órbita da Descida em Defesa da Língua que o MDL celebrava por quarta vez.

Desde o MDL considerámos que o sucesso destas jornadas, quer quanto à assistência quer quanto à consecuçom de objectivos deveu-se à vontade de socializar e estender no possível o nosso trabalho pola língua. Só as condiçons meteorológicas nom acompanhárom nas actividades do domingo. O objectivo fundamental era unir o maior número possível de pessoas comprometidas em volta do trabalho pola língua. Desta maneira, estivérom presentes nas jornadas pessoas pertencentes a inúmeros colectivos que trabalham pola normalizaçom cultural e lingüística no nosso país, como AGAL, Nais e Pais polo Ensino en Galego e muitos outros. É de destacar o facto de que as jornadas fossem um ponto de convívio, encontro cultural e intercâmbio de experiências para pessoas de todos os pontos da Galiza e mesmo do estrangeiro.

As jornadas começárom no sábado com dous roteiros, um que levava até ao castro do Alto dos Cubos (para alguns o Monte Medúlio das crónicas romanas) e outro específico para crianças que incluiu aspectos didácticos sobre a natureza. Para ambos os roteiros o MDL elaborou cadanseus guias informativos adaptados, de forma a facilitar os passeios. A seguir dos roteiros, um grande jantar de confraternizaçom no local cedido ao efeito pola associaçom "Amigos do Aloia", com brinde pola língua incluído.

Na tarde do sábado tivo lugar, com o acompanhamento do bom tempo, a IV Descida em Defesa da Língua: 10 quilómetros de rio num ambiente excepcional de desfrute da cara interior do Pai Minho. Ao tempo que se descia o rio, @s cativ@s assistiam e participavam num contacontos que incluiu umha representaçom com monicreques. A seguir, realizámos com as crianças um obradoiro de plástica que tomava como base o material (folhas, flores, etc.) recolhido durante o passeio didáctico da manhá. À volta, esperava-nos a ceia, e por volta das 23:30, aprendemos a ler no céu, graças ao esforço, interesse, dotes didácticas e paciência de Cándido Dacosta, a quem ficamos enormemente agradecidos.

Na jornada do domingo, apesar da chuva, mantivérom-se as actividades, que consistírom na realizaçom -ainda que só parcial por causa da copiosa chuva- da Senda Botánica, e numha visita ao Centro de Interpretación da Natureza com que conta o Parque Natural do Monte Aloia, actividade de especial interesse para @s miúd@s.

A seguir, novamente um jantar e convívio que se desenvolveu no mesmo ambiente distendido e agradável do dia anterior. Ao longo da tarde, os participantes das Jornadas fôrom abandondando o Parque Natural do Monte Aloia, de regresso às suas casas.

Desde o MDL só podemos agradecer nom só a participaçom, senom a colaboraçom de toda a gente que assistiu e ajudou a organizaçom em toda a classe de tarefas "domésticas" aliviando-nos de parte do trabalho que tínhamos de fazer. Agora, só cabe esperarmos que voltem o próximo ano às II Jornadas da Língua em Tui, e convidem os seus achegados a vir também partilhar connosco o trabalho e o desfrute em defesa da língua.