Palestra da Sílvia Capom sobre "As razons do Reintegracionismo", na Sala Belle Epoque de Ponte Areias

Esta passada quinta-feira, dia 10 de Abril, Sílvia Capom, Ex-porta-voz do MDL, deu umha interessante palestra sobre "As razons do Reintegracionismo", na Sala Belle Epoque de Ponte Areias.

Ante umha trintena de pessoas, convocadas por Nós-UP, dentro das "II Jornadas Independentistas do Condado", a conferencista esmiuçou de forma muito entretida e mesmo simpática as contradiçons existentes entre o desejo de fazer do Galego umha língua de cultura, por parte de colectivos e instituiçons, e o caminho escolhido pola oficialidade, que passa, segundo ela, por banir da estrutura e uso da língua todo o sinal de identidade própria para lançar-se nas maos da ortografia, morfologia e sintaxe espanhola.

Com exemplos curiosos Sílvia Capom, fixo com que as assistentes compreendessem e mesmo se surpreendessem da evidência das posiçons reintegracionistas. Sem deixar de reconhecer que toda escolha normativa é arbitrária até certo ponto, perguntou-se como se pode conseguir a normalizaçom de umha língua, que perde a passos agigantados falantes e utentes, se se veste a língua de umha "cortina de grelos" que lhe impede o contacto com a modernidade, a tecnologia e a globalizaçom. A soluçom nunca pode passar por fechar-se num "recuncho" esperando o final, mas dotar a língua dos instrumento ajeitados para , formando parte do mesmo sistema de línguas com força, nom perder as particularidades que enriquecem o diassistema.

Depois da palestra, que @s presentes seguirom com atençom, tivo lugar um interessante colóquio onde, ao par de pessoas com certo conhecimento do problema linguístico da Galiza, interviram outras pessoas que reconheciam abertamente estar surpreendidas por esta "para eles" nova visom da língua que falavam, que estava, segundo manifestavam posteriormente, aberta ao mundo e com um futuro possível.

Mais de duas horas e meia de diálogo e debate que deixou em tod@s os presentes um bom sabor de boca e nas pessoas nom iniciadas no tema, umha vontade manifesta de conhecer mais e adentrar-se no mundo da recuperaçom do idioma a través da lusofonia.